Komunikatë për Media

Ministri i Ekonomisë dhe Financave, z. Ahmet Shala priti në vizitë Shefin e Zyrës Gjermane  në Prishtinë, z. Karl Albercht Wokalek

Prishtinë, 06. 02. 2008

Ministri për Ekonomi dhe Financa, z. Ahmet Shala gjatë takimit që pati me Shefin e Zyrës Gjermane në Prishtinë, z. Karl Albercht Wokalek,  shprehi mirënjohjen për shtetin  dhe popullin gjerman për bashkëpunimin dhe ndihëm që ju ka ofrua Kosovës gjatë gjithë këtyre viteve.

 “Biseduam rreth mundësisë së vazhdimit të bashkëpunimit në mes Kosovës dhe Gjermanisë në shumë sfera. Në emër të Ministrisë së Ekonomisë dhe Financave dhe Qeverisë së Kosovës e falënderova ambasadorin gjerman për gjithë ndihmat, që i ka dhënë shteti dhe populli gjerman për rimëkëmbjen ekonomike të Kosovës . Do të kemi sfida të mëdha edhe pas pavarësisë , Gjermania ka qenë mbështeste edhe para por do të mbetet mbështeste e fuqishme e sfidave ekonomike dhe politike në Kosovë”, tha ministri Shala.

Në këtë takim u bisedua  edhe rreth përgatitjes së Konferencës së Donatorëve, për këtë çështje Ministri Shala u shpreh : “Ne gjithashtu biseduam edhe për  disa nga elementet se si të përgatisim konferencën e donatorëve më mirë dhe bashkërisht ti bashkërendojmë hapat  qoftë në aspektin teknik apo strategjik që dalin nga kjo konferencë ”.

Ndërsa , Shefi i Zyrës Gjermane në Prishtinë, z. Karl Albercht Wokalek  duke përgëzuar Ministrin Shala për postin e ri, siç u shpreh ai postë i dyfishtë  tha se,”Kemi pasur diskutime shumë të mira , kam përgëzuar  Ministrin për postin e ri, që ka një postë të dyfishtë sepse është Ministër i Financave ,por edhe i Ekonomisë . Kjo është një sfidë e madhe, por unë jam i sigurt që miku im Ahmet Shala ,do të arrijë që ta menaxhojë këtë sfidë.  Kemi biseduar se çfarë mund të bëhet për Kosovën dhe si mund të përmirësohen marrëdhëniet ekonomike me Kosovën në të ardhmen. Sepse pas statusit Kosova do të jetë shtet sovran dhe do të jetë përgjegjëse për të ardhmen e vetë”.

Gjithashtu në këtë takim u diskutua për  të ardhmen e Kosovës pas statusit të saj, për këtë çështje z. Wokalek tha se : ” Gjermania dhe Unioni Evropian do të jenë në  anën tuaj ,do të ju ofrojnë mbështetje dhe ndihmë .Por është detyra e juaj se çfarë dëshironi të bëni me këtë vend . Unë mendoj se Kosova ka një të ardhme të ndritur, por megjithatë duhet shumë punë për tu bërë ”. Në fund të këtij takimi Ministri Shala dhe z. Wokalek ,u pajtuan për bashkëpunim sa më të mirë në mes këtyre dy vendeve ,sidomos në sferën e  zhvillimit ekonomik në Kosovë.