Takimi i Koordinimit Teknik të Donatorëve

Fjala e ministrit Shatri

2 Tetor, 2007

Mirëmëngjesi Z. Kryeministër, Z.Ruecker, Z.Tom Adams, përfaqësues të institucioneve ndërkombëtare, ministra, përfaqësues të agjencive dhe zyrave ndërkombëtare dhe vendore, zonja dhe zotërinj.

E kam kënaqësinë që sot jemi bashkë dhe ju dëshiroj mirëseardhje.

Në fillim dëshiroi të falënderoi bashkësinë ndërkombëtare për mbështetjen e ofruar gjatë konfliktit, në fazën e rindërtimit, dhe  ndërtimit të institucioneve dhe tani në fazën e zhvillimit ekonomik.

Populli i Kosovës dhe institucionet e sajë e respektojnë me mirënjohje të thellë këtë mbështetje dhe reagon në mënyrë praktike ashtu siç u kthye në vend në ditët e para të pas konfliktit pa pritë që të spastrohet vendi nga minat dhe rreziqet tjera. Iu përvesh rindërtimit dhe tani kemi hyrë në fazën e ndërtimit.

Me krenari paraqes para jush faktin që Kosova për katër vite  siguron buxhetin nga të hyrat vetanake, pra me forca të veta.

Ka ndërtuar një sistem fiskal të qëndrueshëm dhe të sigurtë për institucionet e vendit dhe këtë me ndihmën e juaj, të USAID, AER, DFID,BB, FMN, KE, SIDA  e të tjerë.

Falënderoj sponsorët e konferencës së donatorëve BB dhe KE për angazhimin me përkushtim për realizimin e këtij takimi, dhe të përgatitjes së konferencës së madhe me donatorë për buxhetin e Kosovës.

Ne gjithmonë kemi pasur raporte shumë të mira me institucionet ndërkombëtare, përfshirë këtu FMN-në,  Bankën Botërore dhe Komisionin Evropian. Kjo gjithmonë ka qenë shumë  rëndësishme për ne dh ene kemi bërë dhe do të vazhdojmë të bëjmë, përpjekje maksimale për përmbushjen e marrëveshjeve dhe respektimin e rekomandimeve edhe pse nuk kanë qenë të lehta për ne.

Të ballafaquar me kërkesa dhe nevoja të shumta të cilat janë produkt i periudhës së tranzicionit dhe nivelit të zhvillimit ekonomik, probleme me infrastrukturë të dobët, papunësi dhe shkallë të lartë të varfërisë kemi abstenuar me vetëdije nga një pjesë e përmbushjes së nevojave. Kemi respektuar rekomandimet, jemi gjindur në situata të vështira por gjithnjë me qëllim që kjo të na shpërblehet nga ju përmes një përkrahje që sot po e kërkojmë.

Ne kemi një plan të investimeve- që është paraqitur nëpërmes të KASH-it. Forma e mbështetjes që neve na nevojitet është mbështetja buxhetore. Pikërisht nëpërmes mbështetjes buxhetore, ndihma e donatorëve më se miri do të mund të integrohej në programin tonë zhvillimor, për këtë arsye në besojmë se do të kishte edhe ndikim më të madh.

E kam kënaqësinë që sot para jush, Ekipi i MEF-it prezanton Kornizën Afatmesme të Shpenzimeve, për të cilën ka punuar shumë. Unë ndjej kënaqësi se kemi një produkt të shkëlqyeshëm.

Siç e dini, ky dokument është shkruar pas konsultimeve të gjera, nga jashtë me donatorët kryesor si dhe nga brenda me ministritë dhe  Qeverinë dhe me Shtyllën  IV të UNMIK-ut. Dhe në fund është aprovuar në mënyrë formale nga Qeveria dhe KEF. Janë pranuar dhe inkorporuar komentet e dobishme nga të gjitha konsultimet që i kemi pasur, gjë që e ka përforcuar dukshëm këtë dokument.

Sidoqoftë, vlera e këtij dokumenti është me tepër se një letër para jush. Procesi i diskutimeve, përsëritjeve dhe aprovimit final ka ndihmuar në përqendrimin e vëmendjes së Qeverisë së Kosovës në zhvillimin ekonomik.

Gjithashtu ka ndihmuar në krijimin e disa pikëpamjeve të qarta për drejtimet e politikave ekonomike dhe zhvillimore që duhet të përcjellën. E kjo nënkupton edhe marrjen e disa vendimeve të vështira. Një ndër përgjegjësitë kryesore – ndoshta më e rëndësishmja e Ministrisë së Financave në çdo vend është sigurimi i disiplinës  fiskale. Kështu, Ministrat e Financave nëse e kryejnë punën e tyre si duhet, rrallë janë të popullarizuar në mesin e kolegëve të tyre. Për këtë arsye,  pashmangshëm do të ketë doza të pakënaqësisë sa i përket këtij KASH-i. Kjo nuk duhet të shikohet si një dobësi e KASH-it. Në fakt kjo do të jetë një anë e fuqishme , pasi që e vërteton se janë sjellë disa vendime të vështira dhe se prioritetet janë përcaktuar në mënyrë të qartë.

Kur e shikojmë ekonominë e Kosovës, e shohim se mungesat më të ndjeshme janë vendet e duhura të punës për qytetarët e Kosovës. Mirëpo, krijimi i vendeve të punës duhet të jetë i qëndrueshëm dhe duhet të kontribuoj në pasurinë dhe mirëqenien kombëtare. Kjo do të thotë se sektori privat duhet të jetë promotor i zhvillimit, ndërsa që sektori publik dhe investimet duhet të fokusohen në përforcimin e këtij sektori. Kjo është tema qendrore e KASH-it.

Ju dëshiroj mirëseardhje dhe punë të suksesshme dhe ju bëjë thirrje që të na përgjigjeni pozitivisht në kërkesën tone për mbështetje në këtë faze të zhvillimit. Nuk dëshirojmë të mbetemi gjithmonë barrë e bashkësisë ndërkombëtare por duke realizuar synimet tona të përcaktuara në këtë dokument dhe Planin Zhvillimor që po përgatisim, ku dëshirojmë të bëhemi partner i denjë i Juaji.

Falënderoj sponzoruesit e këtij takimi BB dhe BE.