Komunikatë për Media

Prishtinë – 12 mars 2008

Sot u mbajt ceremonia e ndarjes së çeqeve për grantin stimulues për vitin 2007 , ku Kryeministri i Republikës së Kosovës, z. Hashim Thaçi dhe Ministri i Ekonomisë dhe Financave, z. Ahmet Shala, ju ndan grantin stimulues për tatimin në pronë të gjitha atyre komunave, të cilat kanë përmbushur ose kanë tejkaluar pragun  e të hyrave të tatimit në pronë, të  përcaktuar nga Ministria e Ekonomisë dhe Financave, në bazë të Rregullores 2003/29.

“Jemi mbledhur sot në këtë ceremoni, për të treguar vullnetin e mirë të Qeverisë, për stimulimin e  Komunave të Republikës së Kosovës për rezultatet pozitive që kanë arritur në mbledhjen e  tatimin në pronë ”, tha kryeministri, z. Hashim Thaçi. 

Ndërsa Ministri i Ekonomisë dhe Financave, gjatë kësaj ceremonie u shpreh : ”Duke rritur inkasimin e të hyrave komunale, komunat do të jenë më të përgjegjshme ndaj qytetarëve të tyre dhe më të pavarura nga Buxheti qendror, kështu që tatimi në pronë  është investimi më i mirë  i taksapaguesve për komunën ”.

Në lidhje me rëndësinë e tatimit në pronë ,kryetari i asociacionit të komunave, z. Bajram Rexhepi, u shpreh: “Rritja e të hyrave vetanake komunale, duhet të vendoset në mënyrë primare e ne veçanti tatimi në pronë,  për arsye se burimet tjera të të hyrave komunale kanë arritur limitet e tyre praktike ose janë afër arritjes së këtyre limiteve dhe i vetmi instrument komunal me bazë të gjerë i të hyrave komunale legalisht i lejuar është tatimi në prone”.

 Në këtë ceremoni ishte i pranishëm edhe shefi i Zyrës për mbështetje ekonomike të USAID-it, z.Naren Chanmugam , i cili shprehi gatishmërinë e USAID-it për vazhdimin e mbështetjes për Qeverinë  dhe Komunat e Kosovës.

Dhe në fund të kësaj ceremonie Kryeministri Thaçi falënderoi të gjitha institucionet ndërkombëtare  për mbështetjen që po i japin Kosovës në këto momente historike. Ai njëherit  falënderoj përfaqësuesit e komunave, në veçanti komunat që udhëhiqen nga minoritetet, të cilët me punën dhe përkushtimin e tyre po implementojnë politikat e Qeverisë së Republikës së Kosovës, duke krijuar të hyra nga tatimi në pronë dhe tatimet tjera në komunat që ata udhëheqin.