Prezantimi i raportit tremujor fiskal                   

 Drejtues të Departamentit të Thesarit në Ministrinë e Ekonomisë dhe Financave (MEF) në një konferencë për media theksuan se kontribut qenësor në krijimin e suficitit (tepricës së mjeteve) prej 114 milion` euro gjatë periudhës janar- mars të këtij viti, kanë dhënë të hyrat në shumë prej 75 milionë euro , nga shitja e licencës për operator të dytë të telefonisë mobile në vend. Gjatë prezantimit të tremujorit të parë të vitit 2007 , sipas tyre, suficiti buxhetor i krijuar gjatë këtij tremujori ka arritur shumën e 114. 13 milionë euro.

Drejtori i këtij departamenti Lulzim Ismajli tha se të hyrat e realizuara gjatë kësaj periudhe kohore, në buxhetin e Kosovës, arrijnë shumën e 249.48 milionë euro, që paraqesin 36.5 për qind të planit vjetor. "Nëse këtë nivel të të hyrave e krahasojmë me të njëjtën periudhë kohore të vitit të kaluar , del se të hyrat e këtij tremujori , janë për 85.8 për qind më të larta. Në këtë përqindje të lartë të ndryshimit të të hyrave ndikim të theksuar kanë pasur të hyrat nga shitja e licencës për telefoninë mobile, " theksoi ai.

Ndërsa sa u përket shpenzimeve që janë bërë nga agjencitë buxhetore brenda kësaj periudhe kohore, z. Ismajli tha se shpenzimet e realizuara gjatë këtij tremujori arrijnë shumën e 135.3 milionë euro, që sipas tij paraqesin 18.3 për qind të ndarjeve të tërësishme  buxhetore.

Sipas tij, ndonëse shpenzimet e kësaj periudhe kohore, krahasuar me periudhën e njëjtë të vitit të kaluar janë me të larta për 30.2 për qind, ato përsëri janë nën nivelin e shpenzimeve që janë paraparë për këtë periudhë. Ai theksoi se organizatat buxhetore , gjatë kësaj periudhe kohore, i kanë rritur shpenzimet kapitale për 122.3 për qind , krahasuar me të njëjtën periudhë të vitit të kaluar. Ndërkaq, zëvendësdrejtori i Administratës Tatimore të Kosovës(ATK) Sakip Imeri tha se kjo administratë , brenda këtij tremujori ka arritur që të grumbullojë të hyra në shumë prej 35.7 milionë euro. Sipas tij, të hyrat më të larta kanë ardhur nga vjelja e tatimit në vlerën e shtuar(TVSH) që sipas tij arrijnë shumën e 10.3 milionë euro. Bujar Shatri nga Shërbimi Doganor i Kosovës (SHDK) bëri të ditur se ky shërbim gjatë këtij tremujori ka arritur që në arkën e buxhetit të Kosovës të grumbullojë 108.6 milionë euro.

Raporti i përkohshëm i buxhetit tremujori  2007