Komunikatë për Media

Prishtinë, 21. 01. 2008

Në vazhdën e takimeve zyrtare me përfaqësues të ndryshëm të zyrave ndërkombëtare në Kosovë, Ministri i Ekonomisë dhe Financave, z. Ahmet Shala,  ka pritur për vizitë Shefin e Zyrës Britanike, z David Blunt, dhe shefin e DFID-it, z Mark Poston.

Në këtë takim u diskutua për bashkëpunimin midis Ministrisë së Ekonomisë dhe Financave dhe Zyrës britanike në Prishtinë.

 “Ministria e Ekonomisë dhe Financave dhe unë personalisht kishim nderin ta presim për vizitë z. Blunt, shefin e Zyrës britanike dhe shefin e DFID-së, z. Poston, dy institucione shumë të rëndësishme britanike, të cilat kanë qenë të involvuara në shumë projekte të rëndësishme për Kosovën. Biseduam për koordinimin dhe bashkëpunimin në të ardhmen, midis Ministrisë së Ekonomisë dhe Financave me Zyrën britanike dhe DFID-in. Gjithashtu, biseduam edhe për koordinimin  me donatorë të tjerë në Kosovë që t’i konsolidojmë projektet  të cilat do të jenë me prioritetet që i cakton Qeveria e Kosovës në të ardhmen ”, tha Ministri për Ekonomi dhe Financa, z Ahmet Shala.

 Gjatë këtij takimi u diskutua edhe për përgatitjen e konferencës me donatorë, për të cilën çështje shefi i Zyrës britanike, z. David Blunt, u shpreh: ”Dua të them që fokusi i bisedës sonë kanë qenë përgatitjet për konferencën e donatorëve. Unë dhe ministri kemi pasur diskutime të mira për hapat që Kosova duhet t'i ndërmarrë për t'i identifikuar prioritetet e saja zhvillimore, për të forcuar koordinimin me donatorë  dhe, gjithashtu, për të përgatitur si duhet konferencën me donatorë, në mënyrë që nga kjo konferencë ju të merrni atë që keni nevojë, por edhe në të marrim atë që kemi nevojë”.

 Të dy bashkëbiseduesit u pajtuan që bashkëpunimi të thellohet edhe në të ardhmen, në dobi të zhvillimit të mëtutjeshëm të Kosovës.