Komunikatë për Media

Ministri i Ekonomisë dhe Financave, z. Ahmet Shala priti në vizitë Shefen e Zyrës Franceze në Prishtinë, znj. Delphine Borione

Prishtinë, 05. 02. 2008

Ministri për Ekonomi dhe Financa, z.Ahmet Shala gjatë takimit që pati me Shefen e Zyrës Franceze në Prishtinë, znj Dephine Borione,  shprehi mirënjohjen për shtetin francez  për bashkëpunimin dhe ndihmën që i ka ofrua Kosovës përmes formave bilaterale të bashkëpunimit dhe  përmes Bashkimit Evropian.

“Sot kisha nderin që ta prisja në zyrën time ambasadoren e Francës në Kosovë, znj.Delphin Borione, e cila është një mike  e Kosovës dhe natyrisht edhe e imja. Ne së bashku biseduam për sfidat dhe momentet që i ka Kosova dhe bashkëpunimin e deritashëm me shtetin dhe popullin  e Francës. Gjithashtu elaboruam ndihmën që ka ofruar Franca si shtet në kuadër të Unionit Evropian, apo përmes programeve bilaterale”, tha ministri Shala.

Gjithashtu në këtë takim u bisedua rreth përgatitjes së Konferencës së Donatorëve .Për këtë çështje Ministri Shala u shpreh : “Një ndër temat tjera për të cilat biseduam ishte edhe përgatitja për Konferencën e Donatorëve. Shkëmbyem ide se si mund ta organizojmë këtë konferencë më mirë, në mënyrë që të dalim së bashku më të suksesshëm nga kjo konferencë”.

Ndërkaq, Shefja e Zyrës Franceze në Prishtinë, znj.Delphine Borione, tha se “Pata një takim me ministrin Ahmet Shala dhe ia urova detyrën e re. E përsërita edhe njëherë vazhdimin e mbështetjes së Qeverisë franceze, të kryetarit të Francës, Sarkozy, dhe ministrit të Jashtëm të Francës, Bernard Kueschner dhe zotimin tonë që ta mbështesim Kosovën qoftë përmes formave bilaterale, qoftë përmes BE-së”.

Në fund të këtij takimi Ministri Shala dhe znj. Borione ,u pajtuan për bashkëpunim sa më të mirë në mes këtyre dy vendeve ,sidomos për përmirësimin e gjendjes sociale dhe zhvillimi ekonomik në Kosovë.

Me respekt nga :

Zyra për Informim – Ministria e Ekonomisë dhe Financave