Komunikatë për Media

MINISTRI SHALA U TAKUA ME SHEFIN E ZYRËS TURKE MUSTAFA SARNIÇ

 Prishtinë – 05 mars 2008

Ministri i Ekonomisë dhe Financave, Ahmet Shala, priti sot në një takim shefin e zyrës turke në Kosovë, z. Mustafa Sarniç.

Fillimisht, ministri Shala falënderoi përzemërsisht Turqinë për njohjen e shpejt të pavarësisë së Kosovës dhe për ndihmën dhe përkrahjen që i ka dhënë ky vend popullit të Kosovës në vazhdimësi. Ai theksoi që qytetarët turq me prejardhje nga Kosova dhe viset e tjera shqiptare do të jenë urë e fortë lidhëse e bashkëpunimit midis dy vendeve.

Më tutje, ministri Shala tha se bashkëpunimi intensiv ekonomik dhe tregtar midis Turqisë dhe Kosovës duhet të intensifikohet edhe më tutje. Ai tha që Kosova mirëpret investitorët turq, duke i inkurajuar ata që t’i shtojnë edhe më shumë investimet e tyre në Kosovë në të gjitha fushat.

“Në këtë fazë nëpër të cilën po kalon Kosova, zhvillimi ekonomik është prioriteti kryesor i Qeverisë së Kosovës. Në këtë kuadër, unë ju lus që t’i inkurajoni bizneset turke që të vijnë dhe të investojnë  në Kosovë në fushat ku ka interes dypalësh”, tha Shala.

Shala gjithashtu shtoi që institucionet e Kosovës dhe të Turqisë duhet t’i formalizojnë sa më parë nismat për nënshkrimin e marrëveshjeve për bashkëpunim ekonomik dhe për heqjen e tatimeve të dyfishta, duke krijuar kështu një ambient më të përshtatshëm të bashkëpunimit midis bizneseve Kosovare dhe atyre turke.

Nga ana tij, shefi i zyrës turke, z. Mustafa Sarniç, falënderoi ministrin Shala për pritje, duke theksuar që pas pavarësisë së Kosovës prioritet i Turqisë do të jetë bashkëpunimi i ngushtë ekonomik me Kosovën. Duke përmendur angazhimet e deritashme të bizneseve turke në Kosovë, ai theksoi se qeveria turke edhe në të ardhmen to të bëjë përpjekje për t’i inkurajuar bizneset turke që të investojnë në  Kosovë.

Edhe z. Sarniç u dakordua që nënshkrimi i marrëveshjeve për lehtësira tregtare midis dy vendeve do të ishte në dobi të zhvillimit të bashkëpunimit në të gjitha fushat.