Ahmet Shala

      Ministër në Ministrinë e Ekonomisë dhe Financave 

 

Ahmet Shala është emëruar Ministër për Ekonomi e Financa më 9 janar 2008. Në kapacitetin e tij si Ministër ai është përgjegjës për buxhetin, thesarin dhe mbledhjen e të hyrave, si dhe për politikat ekonomike e fiskale në Kosovë.

Para se të bëhej Ministër i Financave, Shala ka qenë Zëvendës Menaxher në Agjencinë Kosovare të Mirëbesimit, përgjegjës për procesin e privatizimit në Kosovë. Ka qenë përgjegjës për drejtimin e divizionit për menaxhim dhe privatizim të rreth 500 ndërmarrjeve në pronësi shoqërore të Kosovës. Në periudhën 2000 deri më 2002, Shala ka qenë zëvendës drejtues i Departamentit për Tregti e Industri, i ngarkuar me drejtimin e zhvillimit të strategjisë, politikave e procedurave për komercializim dhe transformim të Ndërmarrjeve në pronësi shoqërore dhe për zhvillim të sektorit privat. Një kohë ka qenë gjithashtu Këshilltar i politikave për zhvillimin ekonomik në kuadër të Shtyllës IV (Misioni i Bashkimit Evropian në Kosovë).

Gjatë viteve 1990-të ka punuar në biznesin privat në fushën e edukimit dhe është themelues i “The Cambridge School”, që është një nga institucionet prijëse për mësim të gjuhës angleze (ELT). Shala ka drejtuar gjithashtu biznese private, komerciale dhe prodhuese. Në fillim të karrierës së tij ka punuar në Kompaninë minerare Trepça në Departamentin e tregtisë të jashtme.

Ahmet Shala ka gjithashtu një karrierë të shquar universitare. Vazhdon të jetë profesor i marketingut, modelimit dhe statistikës në Fakultetin Ekonomik të Universitetit të Prishtinës. Shala ka qenë gjithashtu ligjërues për matematikë, statistikë dhe modelim ekonomik.

Ahmet Shala ka ndjekur studimet e doktoratës për ndërmarrësi dhe menaxhim të biznesit të vogël në Universitetin Vaxjo (Suedi) dhe në Universitat Autonoma de Barcelona (Spanjë). Ka marrë gradën Master në Administrimin e Biznesit (MBA) nga Universiteti i Prishtinës më 1988 dhe Bachelor (BA) në Ekonomi dhe Administrim Biznesi në Universitetin e Prishtinës më 1985. Më 1995, ka prezantuar tezën e doktoratës në Alternativat strategjike, të titulluar “Zhvillimi integral ekonomik i viseve shqiptare dhe integrimi në Evropë – Qasje kuantitative”, që është aprovuar nga Fakulteti i Ekonomisë së Universitetit të Prishtinës.